يا سايق التاكسي يا أيُها الأسطى
نزلنى وحياتك جنب دي اليافطه
أطلع لآخر دور أقابل الدكتور
صاحب النفوذ والعلم والكلمه والسلطه
يكتب لي كلمه لصاحبه السيد المسئول
أروح له بيها على طول
يحطنى ف الخطه
خريج بَّدّور عن عمل، عندي أمل
وخيبتى راكبه ميت جمل
ومحتاج أنا واسطه
يمكن ف يوم ألقالي شغلانه
تنجدني م الحيره والنكد والورطه
بدل القعاد ف البيت
والرغى والحواديت
والبص لخلق الله ف السقطه واللقطه
صياد اشتغلت ف مركب
وسفرجى مش باكدب
وطباخ عملت الكشري والرز بالخلطه
وكمان مندوب مبيعات
طفايات وولاعات
وزمان ورا الحلاق
كنت شايلله الشنطه
وروحت أتاجر ف الورق
مالي إنسرق
وع الفاضى راح تعبى
ف الشيله والحطه
شاروا عليه الناس أتعلم كمبيوتر
آخد شهاده منه
هتنططنى نطه
خدت الشهاده وروحت للسيد الأستاذ
قال لي تدوبها ف كُبايه
وتقوم تشربها ف شفطه
حطم كل آمالي وسابنى
للأوهام علشان تركبنى
وتودينى رصيف الخيبه
أندم تانى وأقول كات غلطه
غلطه ما كانت ف الحسبان
بعد شقايه تظهر وتبان
وألقى نفسي بعد دا كله
راجع تانى أنام ع البسطه
وأقعد أغنى وأسلى ف روحي
" حطه يا حطه ، يا فلفل شطه "
وأنام على نفسي وأحلم إني
بقيت مسئول للهجره ف مالطه
تحت يدي ساعي خاص
وسكرتيره زي ما تقول لهطة قشطه
وعندي نسناس اسمه بوش بوش
وبغبغان وكمان قطه
وتحت إيدى أفخم عربيه
تشبه راس سيد قشطه
وعندي فيلا وقصر كبير
ومترو ، وسكه حديد ، ومحطه
ومدينة ماجيك لاند بتاعتى
وشرم الشيخ وميامى وطنطا
ومُرشح أبقى وزير للدوله
وأهو أنا أولى
من زيد وعبيد والشله الهابطه
وكتير شاروا عليه النيتو
وحق الفيتو
ضد الشعب وضد الشرطه
وأمسك أمن العالم في إيدى
وكأني ماسك رقبة بطه
وكل العالم يرفع صورتي
و يحكى بسيرتي
وف مره جات سيرتي
صَّحيتنى من نومي زغطه
لقيتنى راقد ع الأسفلت
والشمس بتلسع ف قفايه
وولا فيه تاكسي
ولا فيه يافطه
6/2002
ليست هناك تعليقات:
إرسال تعليق